Manwal: kif nuża verb.mt ?
Verb.mt huwa maħsub biex issib il-konjugazzjoni ta’ verb u xi tagħrif ieħor dwaru malajr kemm jista’ jkun. Importanti li dejjem tuża l-karattri ċ, ħ, ġ u ż meta tfittex. Hemm diversi modi kif tfittex verb:
Bil-fittiexa lokali
Il-fittiexa lokali hija l-iżjed mod ħafif kif issib il-verb li trid. Agħfas fuq it-tliet rigi bojod ta’ hawn fuq biex ittella’ l-menù u mbagħad agħfas fuq il-fittiexa (search engine) bil-lenti li minn bajda ssir oranġjo. Din il-fittiexa kapaċi ssiblek kollox:
▪ il-verb innifsu (u allura l-mamma) eż. daħal
▪ il-forma tal-verb eż. bierek (III), tbierek (VI), eċċ.
▪ l-għerq eż. b-r-k jew iz-zokk morfemiku eż. -park-
▪ il-mudell eż. rebaħ
▪ hux verb ewlieni jew imnissel (daħħal ewlieni jew mnissel)
▪ hux verb trilitteru jew kwadrilitteru (daħħal trilitteru jew kwadrilitteru)
▪ hux verb sħiħ jew dgħajjef (daħħal sħiħ jew dgħajjef)
▪ għal verb sħiħ, hux trux (daħħal trux)
▪ għal verb dgħajjef, hux xebbiehi, moħfi jew nieqes (daħħal xebbiehi, moħfi jew nieqes)
▪ il-konjugazzjoni fl-imperfett, fil-perfett u fl-imperattiv eż. nbierek, berikt, eċċ.
▪ id-definizzjoni bl-Ingliż eż. to eat
▪ in-noti taħt xi verbi
F’każijiet rari, il-fittiexa lokali ma ssibx verb li fil-fatt ikun qiegħed fis-sit. Meta jiġri hekk, ipprova bil-fittiexa Google jew manwalment permezz tal-listi.
Bil-fittiexa Google
Il-fittiexa Google tuża s-servizzi ta’ Google biex tfittex fis-sit verb.mt biss, u għandha tintuża jekk il-fittiexa lokali ma tkunx qed taħdem sew. Agħfas fuq it-tliet rigi bojod ta’ hawn fuq biex ittella’ l-menù u mbagħad agħfas fuq il-logo ta’ Google. Għalissa, hemm xi verbi li din il-fittiexa ma ssibx, anke jekk ikunu fis-sit. Mill-bqija, il-fittiexa Google issib eżatt l-istess informazzjoni li ssib il-fittiexa lokali.
Bil-listi
B'dan il-mod tgħaġġel inqas biex issib verb, iżda fl-istess ħin huwa l-aktar mod sigur. Agħfas fuq it-tliet rigi bojod ta’ hawn fuq biex ittella’ l-menù, agħżel ittra (skont l-ewwel ittra tal-għerq jew tal-mamma tal-verb) u f’xi każijiet, trid tagħżel ukoll bejn il-lista tal-verbi li għandhom għerq jew il-lista tal-verbi li għandhom zokk morfemiku.
Listi ta’ verbi bl-għerq: dawn huma elenkati l-ewwel skont il-forma tal-verb (minn I sa X) u mbagħad skont l-għerq tal-verb b’mod alfabetiku. Agħfas fuq il-verb li trid biex ittella’ l-iskeda sħiħa tal-verb.
Listi ta’ verbi biz-zokk morfemiku: dawn huma elenkati skont il-mamma tal-verb b’mod alfabetiku. Agħfas fuq il-verb li trid biex ittella’ l-iskeda sħiħa tal-verb.
Kull lista għandha fittiexa speċjali li permezz tagħha tista’ tirfina t-tiftixa tiegħek. Din il-fittiexa kapaċi tirfinalek il-lista skont:
▪ il-verb innifsu (u allura l-mamma) eż. daħal
▪ il-forma tal-verb eż. bierek (III), tbierek (VI), eċċ.
▪ l-għerq eż. b-r-k jew iz-zokk morfemiku eż. -park-
▪ il-mudell eż. rebaħ
▪ hux verb ewlieni jew imnissel (daħħal ewlieni jew mnissel)
▪ hux verb trilitteru jew kwadrilitteru (daħħal trilitteru jew kwadrilitteru)
▪ hux verb sħiħ jew dgħajjef (daħħal sħiħ jew dgħajjef)
▪ għal verb sħiħ, hux trux (daħħal trux)
▪ għal verb dgħajjef, hux xebbiehi, moħfi jew nieqes (daħħal xebbiehi, moħfi jew nieqes)
▪ il-konjugazzjoni fl-imperfett, fil-perfett u fl-imperattiv eż. nbierek, berikt, eċċ.